31-Aug-2016 tagged as စိုင်းစိုင်းခမ်းလှိုင်
နာမည်ကျော် ဟစ်ဟော့ပ် အဆိုတော် စိုင်းစိုင်းခမ်းလှိုင်နဲ့ တွေ့ဆုံပြီး အောက်တိုဘာလ ၉ ရက်နေ့မှာ ဈေးကွက်အတွင်းကို စတင်ဖြန့်ချိပေးမယ့် SAI နှုတ်ခမ်းနီကို ထုတ်ဖြစ်ခဲ့ပုံ၊ စီးပွားရေးလုပ်ငန်း တစ်ခုအနေနဲ့ အလှကုန် ပစ္စည်း ထုတ်လုပ်တဲ့ လုပ်ငန်းကို ရွေးချယ်ဖြစ်ရတဲ့ အကြောင်းရင်းနဲ့ ဘဝလက်တွဲဖော် ရှာဖွေမှုနဲ့ ပတ်သက်တဲ့အကြောင်းတွေကို The Voice က မေးမြန်းဖော်ပြ ထားပါတယ်။
Voice : နာမည်ကျော် အမျိုးသား အဆိုတော် တစ်ယောက်၊ သရုပ်ဆောင် တစ်ယောက်က SAI နှုတ်ခမ်းနီ ထုတ်တယ်ဆိုတော့ တချို့ ပရိသတ်တွေလည်း အံ့သြ သွားကြတယ်။ ဘယ်လို စိတ်ကူးနဲ့ SAI နှုတ်ခမ်းနီကို ထုတ်ဖြစ်ခဲ့တာလဲ။
SSKL : ကျွန်တော်က စီးပွားရေး တစ်ခု လုပ်ဖို့အတွက် စိုင်းပြင်း နေခဲ့တာတော့ လွန်ခဲ့တဲ့ နှစ်နှစ်လောက်ကတည်းက ဖြစ်ပါတယ်။ အဲ့ဒီ အချိန်ကတည်းက အလှကုန် လုပ်ငန်းကို လုပ်မယ်လို့ ရွေးချယ်ဖြစ်ခဲ့ပြီးတော့ ကြားထဲမှာတော့ လေ့လာတာတွေ၊ သင်ယူတာတွေ၊ ဈေးကွက် ထောက်လှမ်းတာတွေ လုပ်ပါတယ်။ အလှကုန်ထဲကမှ ဘယ်ပစ္စည်းကို အရင်ဆုံး စထုတ်မလဲပေါ့။ အရိုးသားဆုံး ပြောရရင် အလှကုန်ပစ္စည်း အများကြီးကို ထုတ်နိုင်တဲ့အင်အား ကျွန်တော့်မှာ မရှိပါဘူး။ လူအင်အားရော၊ ငွေအင်အားရော၊ အရင်းအနှီးရော မရှိပါဘူး။ နိုင်ငံတကာမှာဆို အလှကုန်ပစ္စည်းတွေ ထွက်လာပြီဆိုရင် ခေါင်းစ၊ ခြေဆုံး ထုတ်ကြတာပါ။ ကျွန်တော့် အနေနဲ့ကတော့ အသင့်တော်ဆုံးနဲ့ အရောင်းရနိုင်ဆုံးလို့ မှန်းတဲ့၊ အဖြစ်နိုင်ဆုံးလို့ ယုံကြည်တဲ့ နှုတ်ခမ်းနီကို စပြီး ထုတ်ဖြစ်ခဲ့တာပါ။ သုံးစွဲသူ ပရိသတ်တွေ နှစ်ခြိုက်လို့များ အောင်မြင်မှု ရခဲ့ရင် တခြားပစ္စည်းတွေပါ ထပ်ထုတ်ဖို့ ရည်ရွယ်ထားပါတယ်။
Voice : ကိုယ်က အနုပညာသမား တစ်ယောက် အနေနဲ့ပဲ တောက်လျှောက် ရပ်တည်ခဲ့တာလေ။ အနုပညာနဲ့ မဆိုင်တဲ့ စီးပွားရေးနယ်ပယ် တစ်ခုမှာ ခြေလှမ်းစတဲ့အခါ ဘယ်လို အခက်အခဲတွေ၊ လေ့လာ သင်ယူစရာတွေ တွေ့ခဲ့ရလဲ။
SSKL : ကျွန်တော်လည်း ဒီလောကအကြောင်းကို အများကြီးတော့ သိပ်နားမလည်သေးပါဘူး။ ပြောရရင်တော့ စမ်းတဝါးဝါးနဲ့ သွားနေရတာပါပဲ။ ဒါပေမဲ့ ကျွန်တော်တို့ရဲ့ SAI Cosmetics ကုမ္ပဏီမှာ ကျွန်တော် တစ်ယောက်တည်းတော့ မဟုတ်ဘူးပေါ့လေ။ ကျွန်တော့်ရဲ့ Team ရှိတယ်။ သူငယ်ချင်းတွေ ရှိတယ်။ ကျွန်တော်တို့ အားလုံး တိုင်တိုင်ပင်ပင်နဲ့ လုပ်နေကြပါတယ်။ SAI နှုတ်ခမ်းနီကို ကျွန်တော်တို့ လိုချင်တဲ့ အနေအထား၊ အရောင်တွေ ရအောင် စက်ရုံတွေမှာ လိုက်စုံစမ်းပြီး အပ်ဖို့ ကြိုးစားရာမှာ ကျွန်တော်တို့နဲ့ အဆင်ပြေဆုံး ဖြစ်တဲ့ ကိုရီးယားစက်ရုံ တစ်ရုံကနေ မှာယူဖြစ်ပါတယ်။ နောက်ဆုံး Final မထုတ်ခင်မှာလည်း Sample တွေ အများကြီး ထုတ်ပြီးတော့ စမ်းပြီးတော့ သုံးစွဲထားတယ်။ မြန်မာနိုင်ငံ FDA ကိုလည်း ဒီထဲမှာ ပါဝင်တဲ့ ပစ္စည်းတွေကို ပို့ပြီးတော့ ခွင့်ပြုချက်လည်း ရယူထားပြီးပါပြီ။ အောက်တိုဘာ ၉ ရက်နေ့ စမဖြန့်ခင်မှာလည်း ကျွန်တော့်ရဲ့ မိတ်ဆွေ သူငယ်ချင်းတွေကို SAI နှုတ်ခမ်းနီကို စမ်းသပ် သုံးစွဲ ခိုင်းထားပါတယ်။
Voice : စိုင်းစိုင်းရဲ့ SAI Cosmetics ကုမ္ပဏီကနေ နောက်ထပ် ဘယ်လို အလှကုန်ပစ္စည်းတွေ ထပ်ထုတ်ဖို့ ရည်ရွယ်ထားလဲ။
SSKL : အိပ်မက်တွေကတော့ အများကြီးပဲပေါ့ဗျာ။ ဒီအလှကုန် ထုတ်မယ်လို့ စမရွေးခင်ကဆို ဖက်ရှင်ဒီဇိုင်းကို သွားမလား၊ စားသောက် ကုန်ပစ္စည်း တစ်ခုခု ထုတ်မလား ဆိုပြီးလည်း စဉ်းစားဖူးတယ်။ အလှကုန်ထဲမှာတော့ နှုတ်ခမ်းနီဆိုတာက မိန်းကလေးတွေအတွက် အလှပြင် ပစ္စည်း ဖြစ်တယ်။ နောက်ပြီး Eye Shadow လို ပစ္စည်းမျိုးလည်း ဆက်ပြီး ထုတ်ချင်ပါတယ်။ ဒါပေမဲ့ မိန်းကလေးသုံး ပစ္စည်းတွေပဲ မဟုတ်ဘဲနဲ့ ယောက်ျားလေးတွေနဲ့ သက်ဆိုင်တဲ့ ခေါင်းလိမ်းဆီ၊ မျက်နှာသစ်ဆေး၊ ရေချိုး ဆပ်ပြာလို ပစ္စည်းတွေလည်း ထပ်ထုတ်ချင်ပါတယ်။ ဒါကတော့ ကျွန်တော့်ရဲ့ စိတ်ကူးယဉ် အိပ်မက်ပေါ့ဗျာ။ ဒါပေမဲ့ ရိုးရိုးသားသား ပြောရရင် ဒီအလုပ်မှာ တစ်လှမ်းပြီး တစ်လှမ်း သွားရမှာပါပဲ။ တစ်လှမ်း အောင်မြင်မှလည်း ရှေ့ဆက်နိုင်မှာ ဖြစ်ပါတယ်။ သုံးစွဲသူ ပရိသတ်တွေက ကျွန်တော့်ပစ္စည်းကို သဘောကျ နှစ်ခြိုက်မှ၊ တကယ် အသုံးဝင်မယ့် ပစ္စည်းဖြစ်မှလည်း ကျွန်တော် အောင်မြင်မယ် ဆိုတာ နားလည်ထားပါတယ်။
Voice : ရယ်စရာ တစ်ခုပြောရရင် စိုင်းစိုင်းရဲ့ နှုတ်ခမ်းနီ တစ်ထောင့် ဝယ်ရင် အနမ်း တစ်ပွင့်ရမယ် ဆိုပြီး သူငယ်ချင်းဖြစ်တဲ့ ဘန်နီဖြိုးတို့လည်း စကြတာတွေရှိတယ်နော်။
SSKL : SAI နှုတ်ခမ်းနီက ကျွန်တော့်ရဲ့ ပထမဆုံး ထုတ်ကုန် ပစ္စည်းဖြစ်တဲ့အတွက် အောက်တိုဘာလ ၉ ရက် နေ့မှာတော့ Junction Square မှာ Brand Lauching လုပ်ဖို့ စီစဉ် ထားပါတယ်။ အဲ့ဒီနေ့မှာ ဘယ်လို အစီအစဉ်တွေနဲ့ တင်ဆက်မလဲ ဆိုတာတော့ အခုချိန်မှာ အတည် မပြုနိုင်သေးဘူးပေါ့။ ဖျော်ဖြရေး အစီအစဉ်လေးတွေလည်း ထည့်မယ်။ ပရိသတ်တွေနဲ့ ရင်းရင်းနှီးနှီး တွေ့ဆုံမယ့် အစီအစဉ်လေးတွေလည်း ပါမှာပေါ့လေ။ ဘန်နီ ပြောသလို ကျွန်တော့် နှုတ်ခမ်းနီ တစ်ထောင့် ဝယ်ရင် Buy One၊ Kiss One တော့ ပေးလို့ ဘယ်ရမလဲ။ ဘာဖြစ်လို့လဲ ဆိုတော့ သူတို့ ဘဲတွေက ဝိုင်းရိုက်ကြလို့ အဲ့ဒီနေ့မှာပဲ ကျွန်တော် တစ်ခါတည်း ကိစ္စ ချောသွားမှာပေါ့။
Voice : အရင်တုန်းကဆို စိုင်းစိုင်းက အနုပညာ တစ်ခုတည်းကိုပဲ အာရုံစိုက်ပြီး လုပ်ခဲ့တယ်။ အခုစီးပွားရေးတွေ စလုပ်တော့မယ် ဆိုတော့ အိမ်ထောင်ပြုတော့မှာမို့ ငွေတွေ ရှာနေတာလားလို့ စိုင်းစိုင်းကို ချစ်တဲ့ မိန်းကလေး ပရိသတ်တွေလည်း စိတ်ပူနေကြတယ်နော်။
SSKL : မူလတုန်းကတောင်မှ ကျွန်တော်က ရုပ်ရှင်နဲ့ ဂီတအလုပ်တွေနဲ့ လုံးချာလိုက်နေတာပါ။ အခုဆို ကျွန်တော့်ရဲ့ အလှကုန်လုပ်ငန်းကို အခြေတကျ ဖြစ်သွားအောင် အချိန်ပေးပြီးတော့ ကြိုးစားရဦးမှာပါ။ ကျွန်တော့်ရဲ့ အသက် အရွယ်အရ ဆိုရင် အိမ်ထောင်ပြုမှာကို စိုးရိမ်ရမယ့် အခြေအနေတော့ မဟုတ်တော့ဘူးပေါ့။ မိန်းမ မရမှာကို စိုးရိမ်ရမယ့် အခြေအနေ ဖြစ်နေပြီပေါ့။ အိမ်ထောင် ကျသွားမှာကို စိုးရိမ်ရမှာ မဟုတ်ဘဲ၊ အိမ်ထောင် မကျတော့မှာကို စိုးရိမ်ရမယ့် အခြေအနေတော့ ဖြစ်နေပြီပေါ့။ ကျွန်တော်လည်း လူထဲက လူသား တစ်ယောက်၊ ပုထုဇဉ် တစ်ယောက် အနေနဲ့ မိသားစုဘဝ တစ်ခု ထူထောင်ချင်ပါတယ်။ အိမ်ထောင်လည်း ပြုချင်ပါတယ်။ ဒါပေမဲ့ လောလောဆယ် နှစ်ပိုင်း အတွင်းမှာတော့ အစီအစဉ် မရှိသေးပါဘူး။
Voice : အခုနောက်ပိုင်း စိုင်းစိုင်း ရုပ်ရှင်ကားကြီးတွေ ရိုက်တာ နည်းတယ်နော်။ ဇာတ်လမ်းတွေကို စိစစ် ရွေးချယ်ပြီးမှ ရိုက်နေလို့လား။
SSKL : ကျွန်တော့်အနေနဲ့က ဒီနှစ် တစ်နှစ်လုံးမှာဆိုရင် စက်တင်ဘာလထဲမှာ ဝတ်မှုန်ရွှေရည်နဲ့ ရိုက်ရမယ့် ချစ်သူသာ ပန်းတစ်ပွင့် ဖြစ်ခဲ့ရင် ရုပ်ရှင် တစ်ကားပဲ ရိုက်ဖြစ်ပါတယ်။ နောက်ထပ် ရိုက်ဖို့အတွက်ကတော့ ဇာတ်လမ်းတွေ ရှာနေပါတယ်။ နောက်ပြီး ကျွန်တော့်မှာ ရုံမတင်ရသေးတဲ့ ရုပ်ရှင်ဇာတ်ကား တော်တော်များများ ရှိနေပါသေးတယ်။ အောက်တိုဘာလထဲမှာ From Bangkok To Mandalay ဇာတ်ကား ရုံတင်ပါမယ်။ မရှေးမနှောင်းမှာပဲ ကျွန်တော် လွန်ခဲ့တဲ့ သုံး၊ လေးနှစ်ကတည်းက ရိုက်ထားပြီး မပြရသေးဘဲ ကျန်နေတဲ့ ကာလာစုံ လက်စင်ဆိုတဲ့ ဇာတ်ကား ရုံတင်ပါမယ်။ နောက်ထပ် ရိုက်ပြီးသား၊ ရုံတင်ဖို့ စောင့်နေတဲ့ ရုပ်ရှင် နှစ်ကားလောက်လည်း ရှိပါသေးတယ်။ အဲဒီတော့ ဒီကားတွေ ရုံတင်ဖို့လည်း ကျွန်တော် ကြိုးစားရပါမယ်။ နောက်ထပ် ရုပ်ရှင်ကားတွေ ထပ်ရိုက်ဖို့လည်း ကျွန်တော် ဇာတ်လမ်းတွေ ရှာနေပါတယ်။
The Voice
